• Biblioteca Nacional de Portugal

  O sitio web da Biblioteca Nacional de Portugal dá acceso a múltiples servizos destinados a profesionais da biblioteconomía, da industria do libro e da investigación, así como ao público xeral. Desde o seu catálogo en liña pode descargarse, en diferentes formatos, a dixitalización do manuscrito B da lírica profana galego portuguesa (cod. 10991).
• Biblioteca Apostólica Vaticana

  A Biblioteca Apostólica Vaticana é a biblioteca da Santa Sé e está ubicada na Cidade do Vaticano. A súa páxina web proporciona, entre outros moitos servizos, o acceso á dixitalización de boa parte dos riquísimos fondos que custodia. As imaxes dos manuscritos da lírica profana galego-portuguesa V (Vat. lat. 4803), L (Vat. lat. 7182) e C (Vat. lat. 3217) poden consultarse e descargarse desde o devandito sitio web. Para unha consulta áxil de V na BAV, téñase en conta que o primeiro folio do cancioneiro ofrecido en Palmed, V-00r, se corresponde co 3r da dixitalización da BAV.
• Universo Cantigas

  O portal Universo Cantigas presenta a edición crítica dixital da lírica profana galego-portuguesa. Na primeira fase do proxecto (2016-2018), en función do criterio establecido polo equipo responsable do recurso, foron editadas 640 cantigas, das que se ofrece, tamén, a correspondente transcrición paleográfica.