A orixe de BiRMED foi simultánea á da Base de datos da lírica profana galego-portuguesa (MedDB), formando parte do proxecto Lírica galego-portuguesa dentro do Arquivo Galicia Medieval, ambas as bases de datos baixo a dirección de M. Brea. Nunha fase inicial, BiRMED rexistrou de maneira exclusiva traballos versados na produción lírica dos trobadores galego-portugueses, pero, a partir de 2006 (ano en que se presentou a versión 1.0), ampliou a súa área de especialización mediante a incorporación de referencias relativas ás Cantigas de Santa Maria e, desde 2009, tamén a unha ampla selección de textos da prosa literaria medieval (versión 2.0). Outra importante novidade da versión 2.0 consistiu en proporcionar un índice de citas, procedendo a un rexistro da bibliografía citada para aquelas contribucións aparecidas a partir do ano 2003 e rexistradas na base de datos.

A versión 3.0, publicada en 2022, incorpora, por unha parte, un novo sistema de buscas coa finalidade de guiar e facilitar a experiencia do usuario, grazas a unha nova interface que fai posible procurar información en distintos campos, de maneira combinada e con opción de escolla múltiple entre as palabras clave, sempre de forma sinxela e intuitiva. Por outra parte, esta nova versión inclúe outras novidades, como a disposición de rexistros enlazados, que concederán ao usuario a posibilidade de levar a cabo consultas cun maior dinamismo e flexibilidade. Así mesmo, incorpóranse rexistros específicos para as recensións de edicións críticas e monografías especializadas no ámbito da literatura medieval galego-portuguesa, como indicio de impacto da súa aparición.